BUS KO PO !

Nakakatakot nang sumakay sa bus ngayon. Sa tulin magpatakbo ng ng drayber, napapaisip ako tuloy kung nagpapanggap siyang drayber at bagkus isa siyang anghel na magdadala sa amin sa Langit( o isa pala siyang alagad ni Beelzebul).

Hindi na bago ang mga aksidenteng sangkot ang mga dambuhala at kumakain sa mga espayong mga bus. Kung hindi nakakabangga ng mga maliliit na sasakyan, parang may sariling pag-iisip at bigla na lang nawawalan ng preno o nahuhulog sa bangin.

Ang mga drayber, tila halata ang hirap ng buhay sa kanilang mga mukha. Para lang makaraos ang sariling pamilya, isinasantabi na ang sariling kaligtasan at ng iba pang gumagamit ng kalsada. Paano naman kasi? naka-depende ang suweldo nila sa dami ng mga pasaherong sumasakay araw-araw. Kaya ang resulta, singit dito, overtake doon. Pag lumalalim na ang gabi, nagmimistulang track ng Formula 1 yung mga kalsada dahil sa mga nag-kakarerahang mga bus. Di na alintana ang mga traffic warning devices, maka-una lang sa kikitain.

Ang dapat sana na serbisyo publiko sa mga mananakay ay naging negosyo ng iilang sakim na bus operators.

Kaya dapat na sigurong gawing fixed ang sweldo ng mga bus draybers natin. Kailangan din nating limitahan ang pamimigay ng prangkisa depende sa kapasidad ng ating mga kalsada. Kailangan na na rin kanselahin ang mga prangkisa ng mga operator na ayaw sumunod sa batas-trapiko. Wag lang basta suspindihin para madala. Kailangang ipamukha sa mga matitigas na ulong ito na hindi sila ang hari ng kalsada kundi AKO.

Pero habang nagbibingihan ang mga nasa gobyerno at mga operator ng bus, maya't maya na lang tayo makakakita ng mga gumagalaw na kabaong sa kahabaan ng EDSA. Nag-aantay ng mga pasahero dadalhin nila sa huling destinasyon.